Review Micro Figure Kamen Rider Black RX

Halo, kanca-kanca kabeh! Wis pirang-pirang sasi aku durung bisa ngeblog meneh. Lha saiki aku nulis ana neng blog meneh, muga kowe-kowe kabeh isoh menikmati kanthi penak.

Saiki aku bakal ngreview action figure sing gedhene sakupil. Sakupil? Tenan apa ora kuwi? Saestu iki tenanan, aku ora gur waton gojeg. Action figure sing gedhene isoh mlebu bolongan irung kuwi mau jenenge Micro Figure, diarani Micro ya pancen amarga ukuranne sing pancen cilik biyanget, karo driji wae jik luwih gedhe driji. Pabrik sing mrodhuksi Micro Figure kuwi mau Banpresto. O ya, action figure iki mau dudu nggonku, ning sing nduwe kancaku jenenge Burhan Bekti Ismail alias Ennow Carstars. Jare kancaku kuwi mau dolanan iki ora mlebu neng Indonesia, dadi ya kudu pesen saka luwar negeri dhisik. Regane nek ra kleru sekitar 250ewu rupiah. Dolanan cilik semono regane guwedhi tenan, nanging ya ngaranku pancen unik biyanget kok.

Foto-foto neng ngisor iki tak jupuk pas lagi dolan neng acara Toys Fair sasi Desember 2014 ana neng Solo Square. Dadi ya rada dadakan sing njupuk fotone. Sing penting muga-muga postingan iki mau bisa migunani kanggo kowe kabeh sing pengin weruh kaya ngapa wujude dolanan sing gedhene sakupil iki.

Nha iki kira-kira bentuk wadhah Micro Figure Kamen Rider Black RX kuwi mau, gedhene mungkin wadhahe ameh padha karo SIM Card hape ngono kae. Action Figure kuwi mau ana neng sisih pojok ngisor kiwa kertu bagiyan ngarep. Bagiyan mburine lali tak foto, pokoke isine gur tulisan Jepang ngono kae thoklah. Trus, kuwi gedhene ya tak bandhingke karo Finger Doll Kamen Rider Drive nggonku.

Nek sing iki foto Action Figure'e saka cedhakan, pancen cuwilik biyanget, kamera hapeku Lumia 520 sing 5 MP wae ndadak kudu njupuk fotone bola-bali dhisik lagi entuk sing hasile rada cetha kaya ngene. Kuwi gedhene dibandhingke karo driji jempolku sing ana sisih kiwa nggon foto kuwi. Rak ya pancen cilik methisil ngono gedhene.

Foto sing keri dhewe iki nyoba tak bandhingke meneh karo Finger Doll Kamen Rider Drive nggonku. Kuwi Micro Figure Kamen Rider Black RX jare kancaku nek ameh dipajang kudu dikeki magnet cilik kuwi sik nggon ngisore, mbuh gunane asline kaya piye. Kuwi ya dikeki stan gedhe ana lampu warna-warni mungkin ya gunane ben Micro Figure kuwi mau ketok luwih cetha karo ben wong sing pengin ngulati isoh ngerteni. Kuwi ya ana perbandhingan mburine sing kiwa ana sikile SHF Saint Seiya karo sing tengen nek ra kleru Figure skala 1:6.

Ya wis ngono mau sik postingan review dolanan saka aku, ketemu meneh neng postingan saktruse. Maturnuwun.

Iki entuk tambahan gambar langsung saka kancaku sing nduwe Micro Figure Kamen Rider Black RX kuwi mau jenenge Burhan Bekti Ismail aka Ennow Carstars.

Perbandhingan Micro Figure karo sikile Dual Solid Kamen Rider Black RX.

Micro Figure ketok cilik neng sikil tengene Dual Solid.

Micro Figure nek dibandhingke karo Micro SD sing biyasa dinggo memori Handphone.

Dhuwit limangatus rupiyah dibandhingke karo Micro Figure sing ketok luwih gedhe dhuwit recehe.

Obat sing bentuke pil lagi ketok sebandhing karo Micro Figure, mbuh kuwi Pil Tuntas apa Pil Kita.

Wadhah Micro Figure.

Tetep sehat, tetep semangat, ben isoh trus dolanan...