Hunting Dolanan Sekaten

Pirang-pirang dina iki, kurang luwih awal sasi Desember Alun-Alun Lor Surakarta dianakne acara Sekatenan. Neng kono kuwi akeh banget didoli dolanan-dolanan tradisional, saka Pecut, Gamelan sing digawe saka seng, Alat Masak-Masakan sing uga digawe saka bahan seng, Kodhok-Kodhokan sing umpama dipijet bisa muni, Kapal Othok-Othok, lan sakpiturute. Ora gur dolanan tradisional, nanging uga ana pirang-pirang dolanan modern liyane. Bisa didelok saka gambar-gambar sing tak jupuk ana ing ngisor iki:

Ana njero Pagelaran Kraton Surakarta ana kang dodolan Boneka Barbie sakklambine iki, sing genah produk KW alias dudu Ori.

Pinggiran Alun-Alun Lor Surakarta mesthi kowe bakal nemoni kaya ngene iki, wong dodolan dolanan Pasaran sing digawe saka lemah lempung. Uga ketok ana neng gambar yaiku celengan kang awujud kewan-kewanan kayata Macan, Jerapah, Jaran Zebra, lan sakliyane.

Celengan kang wujude rada modern sithik yaiku Doraemon lan mbuh iku manuk-manukan saka kartun apa. Uga sing ana neng sisih ngisor kuwi celengan awujud sapi, lan sing neng ndhuwur ana celengan awujud pitik.

Piranti dolanan pasaran kang awujud timbangan sing digawe saka bahan seng uga bisa didelok ana ing ndhuwur gambar. Sisih tengah gambar uga ketok ana celengan Semar lan celengan Marsha and The Bear.

Celengan Spongebob, Patrick Star lan Angry Bird uga bisa ditemoni ana ing pagelaran Sekaten 2014 iki.

Kapal Othok-Othok uga dadi dolanan khas kang bisa ditemoni ana ing pagelaran Sekaten. Sakliyane kuwi mau ya ana Helm Baja Hitam utawa Kamen Rider utawa jenis Tokusatsu liyane sing digawe saka tangan kreatif bakule.

Topeng Superhero sakliyane Baja Hitam mau ya uga bisa ditemoni neng Sekaten. Nha bakule topeng kuwi mau ya sisan dodolan Kapal Othok-Othok meneh.

Montor-Montoran kang awujud Bus saka bahan dhasar kayu uga bisa ditemoni neng panggonan sing dodolan Celengan uga Pasaran.

Piranti kanggo dolanan Pasaran kang digawe saka lemah lempung, biyasane bocah wadon cilik padha seneng dolanan kaya ngene iki.

Sekaten ora bakal pepak umpama ora ana dolanan tradisionale, kayata sing bisa didelok saka gambar yaiku Topeng Reog, Jaran Kepang, Truk saka kayu lan Gamelan sing digawe saka wesi tipis utawa seng.

Kuwi mau sithik sing bisa takbagi saka Sekaten 2014 kang digelar ana ing Alun-Alun Lor Surakarta. Mumpung iki ijik ana, sumangga para sedherek kang maca tulisan iki tak aturi tindak mrana. Aja lali dolan-dolan, nanging uga tetep nguri-uri Kabudayan Jawa.

Tetep waras, tetep semangat, supaya tetep bisa dolanan...

Giveaway Soft Vinyl Bima X dari Jurnal Otaku Indonesia

Ngeblog meneh, crita-crita meneh. Ndhekwingi kira-kira sesasi kepungkur aku iseng nyoba melu Giveaway alias semacem sayembara ngono neng Facebook Fanpage'e Jurnal Otaku Indonesia, tugase ngeshare artikel perkara Action Figure Satria Garuda Bima X sing regane siji setengah yuta. Aku ya ora nyangka nek isoh entuk hadhiyah sing regane ameh 400ewu rupiyah iki mau, apa meneh ongkire gratisan sisan.

Nyoh, tak wenehi kaya ngapa hadhiyah gratisan saka Giveaway Jurnal Otaku Indonesia ndhekmben kuwi:

Iki wujude kothak paket sing tak tampa saka Jurnal Otaku Indonesia, kowe aja fokus karo tanganku sing alus kuwi ya.

Paket dibukak, trus sing pisanan tak temoni yaiku koran sing wis diuntel-untel, supaya bisa nglindhungi isi paket kuwi mau.

Sakngisore koran sing diuntel-untel kuwi mau lagi ketok isine sing saktenane, yaiku Soft Vinyl Satria Garuda Bima X sing isih dibuntel plastik Bubble Wrap.

Wujud Soft Vinyl Satria Garuda Bima X sing ijik dibuntel plastik Bubble Wrap umpama didelok saka sisih ngarepan.

Soft Vinyl Satria Garuda Bima X lekas ketok wujud asline sakwise plastik Bubble Wrap tak bukak, lan ijik ana plastik transparan kanggo mbungkus isi Action Figure'e.

Wujude Soft Vinyl Satria Garuda Bima X sing ijik ana neng njero plastik wungkus kuwi mau nek didelok saka sisih mburi, ketok kertu tag Satria Garuda Bima X.

Sing paling keri dhewe sing paling maknyus pas ketok wujud asline Action Figure kang nduweni jeneng Soft Vinyl Satria Garuda Bima X cacah 3 iji yaiku Flame Mode, Storm Mode lan Earth Mode.

Alhamdulillah bisa menang Giveaway saka Jurnal Otaku Indonesia iki. Piye ora seneng coba, lha wong kuwi mau nek ana toko regane sijine 130ewu je. Dadine nek ditotal ya sekitar 400ewu sakongkire sisan. Ya bejanlah bisa nduweni Action Figure iki gratis.

Maturnuwun, Jurnal Otaku Indonesia.

Tetep waras, tetep semangat, supaya tetep bisa dolanan...

Satria Garuda Bima X Exhibition with Kids Station Solo Square

Iklan dhisik, ben blogku sajak payu :v.

Halo, ndhekwingi sore aku dolan menyang Pameran Satria Garuda Bima X barengan Stasiun Bocah neng Mal Solo Kothak. Sumangga sesarengan dipunpirsani review saking kula, matur sembah nuwun sakderengipun.

Saka lawang ngarepan Mal wis disambut gerbang sing ana gambar Bima X.

 Display saka cedhakan nek kowe mengko wis mlebu menyang Pameran Bima X kuwi.

Topeng Bima X sing dipajang, nek ra kleru kurang sing werna ungu, lali jeneng form'e.

Bima X Changer sing versi Standart, detail'e apik, nanging nggon pergelangan tangan ora isoh ditekuk, ora ana lampu lan ora ana suwarane. Regane nek ora kleru antara 150-200ewu.

Pedhange Bima X versi Standart, regane nek ora kleru ya padha karo Changer'e versi Standart sing ndhekmau.  Isoh dadi versi manuke sing jenenge Heli Guk Guk Guk, eh Helios.

Panah Asmara Arjundhes, eh maksud'e Panahe Bima X versi Standart. Regane ya ketoke ameh padha karo Bima Changer ndhekmau, uga isoh dadi manuk Helios.

Soft Vinyl Bima X, rega 130ewu jujul 100 rupiyah. Iki action figure sing awet, soale bahanne saka karet, dadi nek dibanting bocah cilik ora bakal remuk. Sayange gur ana sing werna biru lan ijo thok.

DX Bima God Helios Form, saka regane sekitar ameh 400ewu, didiskon dadi gur 300ewu jujul 100 apa 1000 rupiah ngono. Action figure iki akeh artikulasi sendhine, isoh dipose-posene ngono kuwilah. Karo ya entuk God Heliose sing isoh dadi versi manuk lan isoh digabung karo figure Bimane. Iki Bima Satria Garuda sing versi season pisanan, dudu sing versi Bima X.

Dolanan sing iki ora ngerti jeneng genahe, sing ana neng kiwa kuwi cara mainne nek ora kleru kuwi semacem raket trus tengahe ana tali sing pucuke ana bal, trus mainne dijedhuk-jedhukne apa piye ya kurang ngerti. Nek sing sisih kiwa kuwi gangsingan. Regane nek ora kleru sekitar 30ewunan.

Bal bekel sing njerone ana gambare Bima Satria Garuda ana sisih ndhuwur, sing sisih ngisor kuwi ana Gangsingan sing isoh murup. Regane nek ora kleru ya sekitar 30ewunan.

Semacem Candy Toys nanging tanpa Candy (sing biyasa tuku sing versi Kamen Rider biyasane mudheng). Neng kono ana sing senjatane Bima X sing isoh dadi manuke jenenge Helios, lha kuwi  ana 4 macem lan saben bungkuse isine acak, regane 30ewu. Trus ya ana Micro Figure Bima Satria Garuda sing isine 2 utawa 3 figure ukuran cilik sing salah sijine berwarna lan isi liyane gur ana sakmacem werna thok, regane sekitar 20-30ewu. Ana meneh Bima X Power Stone (iki nek ana neng filme digoleki tokohe ngalor ngidul, baknena ya gur didol neng kene -.-), ana 8 macem nek ora kleru, lan saben wungkuse isi 2 macem acak, regane 15ewu.

Sakliyane Pameran dolanane Satria Garuda Bima X ndhekmau, uga ana pameran dolanan saka karakter serial liyane, kayata sing ana neng gambar ngisor iki.

Robot-robotan Gundam, aku ora apal jenenge, jenise lan regane :p.

Gundam-Gundaman meneh. Neng sisih ndhuwur kuwi ana Candy Toys'e gantungan kunci ToQGer nek ora kleru regane sekitar 80ewu. Uga ana Candy Toys 66 Action Kamen Rider Shin Zangetsu, Fourze lan Eternal sing regane sekitar 130ewunan. Karo ana Action Figure One Piece mbuh aku ora ngapali jenenge, linine lan regane.

Pacman dolanane ana sisih ngisor lan tengah, trus ya ana semacem Transformers neng sisih ndhuwur lan tengah sisih tengen foto.

Godzilla iki dolanane ya cukup menarik, sing ngisor sing ukuran rada gedhe kuwi nek ora kleru regane sekitar 300-400ewunan, nek sing cilik bentuke chibi neng sisih ndhuwur kuwi aku lali regane pira.

Power Rangers karo Super Sentai ya dolanane dipajang neng kene. Ana Mighty Morphin Power Rangers sing werna abang kuwi regane sekitar 300-400ewu, nek Power Rangers Megaforce aku ora ngerti regane. Trus sing sisih ngisor kuwi ya ana DX Megazord'e Zyuden Sentai Kyoryuger, nanging mung ana sakmacem kuwi thok.

Kamen Rider ya dipajang barang dolanane ana kene. Sisih pojok ndhuwur kiwa ana Arms Change Kamen Rider Gaim, Baron lan Ryugen regane ameh 900ewu. Sisih ndhuwur kiwa tengen ana Belt'e Kamen Rider OOO, nanging dudu versi DX nek ora kleru regane sekitar 300ewunan. Sisih tengah kiwa ana DX Candroid Kamen Rider OOO rega sekitar 300ewu. Sisih tengah bagiyan tengah ana semacem Candy Toys Medal Kamen Rider OOO rega 50ewunan. Sisih tengah bagiyan tengen ana DX Lockseed Kamen Rider Gaim Kiwami Arms regane mungkin sekitar 300-500ewu. Sisih ngisor ana Belt'e Kamen Rider OOO, ora ngerti versine apa sing genah dudu DX lan regane sekitar 150ewu.

Ana meneh dolanan Kamen Rider sing liyane. Belt'e Kamen Rider OOO kuwi dudu versi DX lan ya wis tak jelasne neng gambar sakdurunge. Sing Kamen Rider W Stag Phone kuwi versi  DX, nanging aku lali regane pira. Mburine Stag Phone ana DX Belt Kamen Rider W, regane nek ora kleru sekitar 1yuta punjul.

Tokyo Vinyl Power Ranger Megaforce sing werna abang lan biru uga dipajang ana kene, regane nek ora kleru 150ewunan. Sing ngisor kuwi ya ana topenge Power Rangers Megaforce lan Power Rangers Samurai.

Ben10 ya dipajang dolanane.

Soft Vinyl Ultraman lan Kaiju sing regane sekitar 130ewu.

Dolanane Ben10 meneh, uga ana topenge.

Gundam-Gundaman meneh.

Gundam-Gundaman meneh lan meneh. Gek ana sing Gundame awake gur separo thok, Bandai pancen tegel tenan mosok awak kok gur separo.

Panggung sing ana sisih kiwa saka lawang mlebu, background'e kuwi nek dipasang neng kamar ya bakal manteb tenan.

Nonton saka lantai ndhuwure ketok ana sing gembandhul Power Stone'e Bima X werna biru lan semacem ornamen bentuke kaya topenge Bima Satria Garuda.

Pameran ditonton saka lantai ndhuwure, ketok panggung, stan display dolanan lan ornamen sing gembandhul nyambut Natal lan uga ketok ana Power Stone Bima X lan topenge Bima Satria Garuda.

Last but not least, jare sapa dolanan manuk tukune kudu neng Pasar Depok. Iki hasil jajan neng Pameran kuwi mau supaya bisa melu Meet n Greet Satria Garuda Bima X. Aku entuk Candy Toys'e senjata Bima X komplit lan Power Stone, uga njupuki brosur Stasiun Bocah lan Flyer acarane kuwi.

O ya, dadi acarane Meet n Greet pemeran Bima X kuwi tanggal 27 Desember 2014 jam 1 awan, jam 4 sore lan jam 7 wengi, karo tanggal 28 Desember 2014 jam 1 awan, jam 3 sore lan jam 5 sore. Sarate ben isoh melu kuwi, kowe kudu blanja minimal 150ewu neng Pameran kuwi, trus mengko kowe bakal didhaftar neng nggon mbak-mbake sing ngurusi. Acara Meet n Greet Bima X kuwi mau mengko pesertane bakal didum per sesi wektu, dadi aja kuwatir nek bakal keramen.

Acara Pameran dolanan kuwi mau dilekasi saka tanggal 17 Desember 2014 lan dipungkasi tanggal 5 Januari 2015. Sakliyane Pameran dolanan, uga ana lomba-lomba liyane (nek pengin mudheng kaya piye ya maraa langsung mrana, aja takon aku, aku gur ngandhani sing tak ngerteni thok soale).

Ya ngono kuwi mau sing bisa tak aturake marang kowe-kowe kabeh, matur sembah nuwun sakderengipun sampun purun maos blog kula. Kepanggih malih wonten artikel selajengipun.

Tetep sehat, tetep semangat, supaya bisa tetep dolanan...